കോതമംഗലം : കോട്ടപ്പടി ചീനിക്കുഴിയിൽ കിണറ്റിൽ വീണ വയോധികനെ അഗ്നി രക്ഷാസേന രക്ഷപ്പെടുത്തി. ചീനിക്കുഴി പരുത്തുവയലിൽ എൽദോസ്(60) ആണ് കിണറ്റിൽ വീണത്. ഏകദേശം 25 അടി താഴ്ചയും 10 അടിയോളം വെള്ളവും ഉള്ള കിണറിലാണ് എൽദോസ് വീണത്. ഇന്നലെ രാവിലെ 7.30 ഓടെ കിണറ്റിനുള്ളിൽ നിന്നും നിലവിളി കേട്ടാണ് സമീപവാസികൾ വിവരം അറിയുന്നത്. കോതമംഗലം അഗ്നിരക്ഷാ സേനയെ വിവരം അറിയിചതിനെ തുടർന്ന് സേനാംഗങ്ങളായ ആബിദ്, സൽമാൻ ഖാൻ എന്നിവർ കിണറിൽ ഇറങ്ങി രക്ഷാപ്രവർത്തനം നടത്തി. തുടർന്ന് എൽദോസിനെ കോതമംഗലം താലൂക്ക് ആശുപത്രിയിൽ പ്രവേശിപ്പിച്ചു. തിങ്കളാഴ്ച രാത്രി എട്ടോടെ ദേഹാസ്വാസ്ഥ്യം ഉണ്ടായതിനെതുടർന്ന് കിണറിന്റെ ഉയരം കുറഞ്ഞ സംരക്ഷണ ഭിത്തിയിൽ ഇരുന്നപ്പോൾ മറിഞ്ഞ് വീഴുകയായിരുന്നുവെന്ന് എൽദോസ് പറഞ്ഞു. മോട്ടോറിന്റെ ഹോസിൽ പിടിച്ച് കിടന്നതിനാലാണ് മുങ്ങിപ്പോകാതിരുന്നത്.

